काठमाडौ, चैत १२ – मलेसियाको जोहार बारुमा स्थानीय युवाहरुको आक्रमणबाट ६ जना नेपालीको ज्यान गएको छ ।

स्थानीय युवाहरुले नेपाली बसेको होस्टलमा आइतबार राती आक्रमण गर्दा ६ जनाको ज्यान गएको र १८ जना घाइते भएको सूचना आएको गृह तथा परराष्ट्रमन्त्री माधवप्रसाद घिमिरेले उज्यालोलाई जानकारी दिनुभयो ।

घटनापछि जोहारबारुमा कर्फ्यू लागेको छ । अहिले मलेशियामा रहेको नेपाली दूतावासको टोली घटनास्थल गएको छ । सरकारले सोमबार मलेशिया सरकारलाई सुरक्षा व्यवस्था मिलाउन र घाइतेको तत्काल उपचार गर्न आग्रह गरेको मन्त्री घिमिरेले जानकारी दिनुभयो ।

उहाँका अनुसार सोमबार नै परराष्ट्र मन्त्रालयले काठमाडौमा रहेका मलेसियन राजदूतलाई बोलाएर घटनाको बारेमा जानकारी लिने तयारी गरेको छ । मलेशियाका कार्यबाहक नेपाली राजदूत लेखनाथ भट्टराई त्यहाँको परराष्ट्र मन्त्रालय जानुभएको छ ।

गृह तथा परराष्ट्रमन्त्री घिमिरेले घटनाका बारेमा नेपाल सरकार अत्यन्तै गम्भीर भएको र भविष्यमा यस्ता घटना दोहोरिन नदिन कुटनीतिक पहल गरिने बताउनुभयो । सरकारले मलेशियामा रहेका सबै नेपालीलाई संयमित रहन पनि आग्रह गरेको  छ ।